Најпрво започнуваме со чистење на зелката. Ја миеме под силен млаз вода. Го сечеме средниот, тврд дел. Користиме свежа зелка како замена за онаа која вообичаено ја користиме за приготвување на сарма. На овој начин може да приготвиме сарма во било кој период од годината.

Следно, ставаме вода, сол, и една кесичка лимонтус во еден подлабок сад, и истиот го ставаме на оган. Бидејќи зелката е свежа лимонтусот ќе даде кислина и подобар вкус во комбинација со филот. Целата главица зелка ја ставаме во водата се додека не зоврие.

По 10тина минуто од зовревањето на водата почнуваме да вадиме лист по лист. При вадењето на листовите тие треба да се обарени, во спротивно вадете ги постепено еден по еден со доволно време измеѓу. Вака продолжуваме се додека не остане мала средината на зелката, која ја тргама на страна во посебен сад.

Батаците ги ставаме да се варат. Откако ќе се сварат ги отстрануваме коските и кожата. Заедно со сланината ги сецкаме на ситни коцкички, додаваме сол и мелен црн бибер и убаво промешуваме.

Го ставаме оризот да се вари на ниска температура. Откако ќе се свари убаво го цедиме, и ја додаваме смесата од месо. Во млака вода го раствораме фантот за пилешко месо, и го додаваме во смесата. Убаво промешуваме за да добиеме хомогена смеса.

Започнуваме со редење на листовите и флот. Најпрво ги редиме помалите листови, притоа ја сечеме средината бидејќи е тврда и потешко се вари. Помеѓу секој слој од листови нанесуваме фил. Вака продолжуваме се додека не ги искористиме сите листови.

Откако ќе завршиме со редењето ја земаме сланината, која треба да биде исечена на тенки ленти, и на секоја страна од наредената сарма додаваме по една лента. Притоа со чепкалки за заби ја прицврстуваме секоја лента. По целата површина посипуваме малку масло за јадење и сармата ја замотуваме со алуминиумска фолија.

Вака приготвената сарма ја печеме во загреана печка на 220 степени. Откако сармата ќе се испече се тргаат фолијата и чепкалките за заби, и се поставува во поширока, плитка чинија.

Препорачливо е да ја оставите сармата да се олади барем 15тина минути пред конзумација. Може да ја послужите со павлака и мелени ореви, или пак парче леб.