Здраво драги пријатели, и добродојдовте повторно на уште една кулинарска дружба!
Едни од моите омилени рецепти се солени деликатеси од месено тесто, кои најчесто се приготвуваат во нашите домови. Тука се најразновидни кифлички, погачи, пити, и се останато што може да се приготви од брашно.
Денес ќе приготвиме прекрасна и вкусна погача во комбинација со фил од праз. Одличен рецепт кој можете да го приготвите за вашите најблиски. Уживајте во наредните неколку минути, набрзо започнуваме…
Подготовка на тестото
Во загреано млеко го додаваме квасецот, малку шеќер, и оставаме смесата да стаса. Откако ќе стаса, во еден поголем сад ја додаваме смесата со квасец, преостанатото млеко и постепено додаваме брашно. Притоа мешаме се додека не добиеме хомогена смеса. По соединување на смесата, убаво го замесуваме тестото. Потоа го покриваме со една крпа и се остава на собна температура околу еден час да отстои.
Подготовка на филот
Празот убаво го прочистуваме под вода и го сецкаме на ситни парчиња. Во тава со малку масло за јадење го додаваме исечканиот праз. Притоа додаваме малку сол и убаво промешуваме. Пропржуваме се додека празот не омекне, и добие жолтеникава боја. Доколку имаме вишок на маснотии, процедуваме и го оставаме на страна да се олади. Притоа, во помал сад го растопуваме марагирнот, и продолжуваме понатаму…
Подготовка на погачите
Работната маса ја покриваме со чаршав, и побрашнуваме. Тестото добро го замесуваме и го делиме да десет парчиња. Земаме едно парче кое го сукаме за да добиеме тенка кора. Врз кората нанесуваме малку од растопениот маргарин и дел од филот. Потоа земаме уште едно парче, го сукаме и покриваме врз кората со нанесен фил. Исто како и претходно, нанесуваме малку од маргаринот и филот. Постапката ја повторуваме со сите преостанати парчиња тесто.
Откако ќе добиеме сноп од кори, со помош на чаршавот замотуваме ролат. Ролатот го поставуваме на претходно побрашнета површина и го делиме на парчиња. Во тава за печење, која претходно добро ја подмачкуваме со маргарин, ги редиме погачите со доволно растојание помеѓу секоја. Печеме на 220 степени, околу 40 минути.
Предлог
Вака приготвените погачи може да ги послужите со козјо сирење, или пак кисело млеко. Серивирајте додека се топли.
Добар апетит, и останете во добро расположение!