Кифли, кифли сите сакаме кифли. Пекарски, лиснати, полулиснати, разни видови со разни филови. Зошто да не и со готови кори? Се чини интересно, нели? Кифлички од готови кори, кој би се сетил на такво нешто. Токму вакви кифлички се мојот предлог за рецепт. Несоменено вкусни и крцкави, ќе ве намамат со прекрасниот мирис и изглед а посебно ќе се изненадите од едноставноста од нивната подготовка. Претпоставувам дека вакви кифлички сеуште немате пробано, па ајде направите ги и уживајте во нивниот прекрасен вкус.

Во еден подлабок сад се додава млекото и маслото за јадење. Во друг сад се сечкаат виршлите заедно со кашкавалот. Корите ги ставаме на работна маса и ги покриваме со кујнска крпа се додека не почнеме со правење на кифлите.

Се зема една кора и ја ставаме на работна маса, ја премачкуваме со течноста од млеко и масло за јадење па уште две кори се редат врз првата, кои ги премачкуваме со истата смеса. Наредените кори една врз друга се сечат на 4 дела па на уште 4 и се добиваат неправилни триаголници (како на сликата). На најширокиот дел на триаголникот се става парче од виршла и парче кашкавал па се замотуваме во форма на кифла.Така се припремаат и останатите кифлички се додека не се потрошат сите кори.

Плехот во кои ќе ги печеме кифлите се обложува со хартија за печење и се премачкува со масло за јадење (може и без него). Потоа ги редиме сите кифли и ги засекуваме одозгора со нож. Кифлите се премачкуваат со разматено јајце и се посипува со сусам. Се печат на температура од 200 степени.